輪到阿女打第二針，上次去搵紗廠社區疫苗接種中心兜左大個圈都搵唔到，原來正門咁啱畀大貨車遮住左，而出口又係喺另一個門口。而家做個地圖remark畀大家參考下先。
送完媽媽同阿女喺正門落車，兜個四方形就可以喺出口附近有個凹位，大約可以停到四架車左右，咁可以喺度等佢地出黎然後直接上車走。
打完針之後，按原定計劃入屯門V City，因為之前用The Points積分喺錦華坊換左個玩具仔畀阿女，同時又喺V City換左啲口罩，咁就可以一次過拎晒。似乎係第五疫情過後，大約1點鐘到達，都要排左三架車先泊到入去停車場，已經好耐無試過要排隊入停車場了。泊得V City，梗係用1,500積分換免費泊車一小時啦。為避免餐廳人多，順便買埋外賣後，兜左去卓爾居掘頭路開餐。
食飽後無所事事，以為屯赤隧道口個浩和街大草地係新景點無乜人去，點知原來去到車仲多過人，好彩憑經驗好快吼到邊架車即將離開，算叫做唔駛等既情況下停到喺路邊。
呢個大草地既景觀真係一流，不過所謂既草地其實並不平整，兼且周圍沒有配套，是沒有洗手間或者垃圾筒，實在係不適宜喺度picnic。我直覺覺得呢個地方其實並不對外開放，相信喺越黎越多人黎玩，兼且當日眼見太多車亂泊，不出半年就會全面封閉起來。希望大家真係識得泊車（唔好阻到任何其他車或人），以及懂得玩完之後收拾自己帶來的垃圾走。
喺浩和街大草地逗留約大半小時後，離開並首次利用屯赤隧道前往東涌，真係有啲失禮。其實一直都想試行下屯赤隧道，但由於屋企喺市區，實在係諗唔到有咩路線，係需要兜一大個圈之後先返屋企。今次其實都有少少為行而行，因為去到東涌之後，只係喺麥當勞買左啲雪糕上車食，之後就返屋企。
悠悠閒閒咁又一日，呢一日無任何泊車費支出！
