到底畀$250泊酒店24小時好，還是泊咪錶好？

今次黎到香港黃金海岸酒店一泊二食，直至出發前都未決定到要泊入酒店呢，還是等咪錶泊$4一個鐘好。

大家第一個印象可能係，$250 vs $4喎，酒店又咁近咪錶位，唔駛諗梗係泊咪錶啦！我初時都係大咁諗，但慢慢地諗最後決定直駛至酒店門口，交低車匙畀代客泊就check in。到底過程中我考慮過啲咩呢？

首先，開始check in時間係下午3點。由於只係住一晚，梗係第一時間check in可以玩盡啲時間，所以喺外面食埋晏之後，時間調較得啱啱好3點零就到左酒店門口。由於check in當日係星期日，黃金海岸酒店前既露天咪錶位勢入爆滿，已經打消左等位既念頭；另外亦有考慮到先泊黃金海岸商場停車場，因為極大可能夜晚喺呢度食晚飯，所以應該可以有免泊2小時。如果由3pm泊到9pm (之後揸返去露天咪錶位)，6個鐘減免泊2個鐘即是要畀$13×8 ($13/半小時) = $104。去到露天咪錶位，想心安理得啲就入多一個鐘$4到10pm收工，第二朝8am先至要再入。

第二朝由8am入咪錶至2pm，合共6小時即$24。加埋前一日既泊車錢，合共時租泊車$132。而家選擇左喺酒店裡面畀$250泊24小時，額外既$118到底有咩價值呢？

第一，全部人/全家人可以一次過喺酒店門口落車同落晒行李，唔駛好似司機咁落晒貨就走人去泊車。兼且如果放低晒人同行李後係泊去黃金海岸商場停車場的話，泊完又要行返5分鐘先返到酒店滙合家人，前後都要15分鐘時間。如果直接先泊入商場，又要大袋細袋行10分鐘先到大堂check in，無晒台型。

第二，如果係泊喺露天咪錶位過夜，想抄牌零風險就需要第二朝8am開始入錶，即係大約7:45am起身。7:45am可能對於某啲人係好晏，但對於我黎講係倒塔咁早。

第三，8am入完第一次兩小時後，加埋遙距入錶之後12pm都再要入一次，諸如此類。如果2pm未走得就額外行多一次，每次需時10-15分鐘。因為當時都未知會玩緊乜，你話明明係游緊水或者食緊早餐，但係要趕去入錶，其實都幾掃興。

第四，泊喺酒店停車場會泊左落去酒店地庫停車場，部車唔駛日曬雨淋之外，第二朝亦唔需要擔心部車暴晒六小時後需要開大個風口吹10分鐘先勉強上到車，瀟瀟灑灑就等部車有人揸返上黎，再慢慢擺返好行李繼續行程。

當然，每個人都有啲喜好或者討厭既事。如果大家試過畀代客泊整花過，相信唔駛錢都唔會畀條車匙人地；又或者有啲人會覺得總之邊個方案平就用邊個，亦都係人之常情。

不過最後提提大家，黃金海岸酒店停車場24小時泊$250只限星期日至五，星期六及公眾假期前夕會颷升到$400。到時候你自己再計計數吧。